«ՀայՇտեմ»-ը բազմամակարդակ որոնման համակարգով ու բարդ հարցումների հնարավորությամբ թվային մասնագիտացված կորպուս է՝ ուղղված արդի գրական արևելահայերեն տեքստերի շարահյուսական ծառերի շտեմարան ստեղծելու հիմնական նպատակին։

Լեզվական համաժամանակյա իրավիճակի ներկայացվածությունը կորպուսում ապահովվում է գեղարվեստական արձակ տեքստերի ու պարբերական մամուլից տարաբնույթ հրապարակումների միջոցով։ «ՀայՇտեմ»-ն ունի նաև բուհական լեզվաբանական դասագրքերից վերցված օրինակների ենթակորպուս (կորպուսի մասնագիտացված բնույթը)։ Կորպուսը պարունակում է շուրջ 100 հազար բառամթերք և 5 հազար շարահյուսական ծառ՝ ենթադրությամբ, որ այս ծավալը բավարար է լեզվական միավորների վերլուծության օրինաչափ հաճախականություն ապահովելու համար։

«ՀայՇտեմ»-ի մշակումները հիմնվում են տեքստի վերլուծության հաջորդական, բազմամակարդակ ներկայացման վրա. այն պարունակում է մոդուլային հետևյալ բաղադրիչները.

Գրանշանային վերլուծություն (բառանիշավորում, Tokenization and Word Segmentation),

Ձևաբանական վերլուծություն (բառույթավորում, խոսքիմասային ծանոթագրում, POS Tagging),

Շարահյուսական վերլուծություն (նախադասությունների կախվածության ծառերի կառուցում, Parsing)։